吃煙

對於煙的味道，我是抗拒的。

不過很喜歡看煙的樣子，很難形容，煙就是煙。

有人說，多漂亮的女孩子吸煙，都是醜的，
我說，只是因為她並不是真的漂亮。

前幾天才來看《志明與春嬌》。



作為休閒娛樂，是不錯的。

以彭浩翔來說，也沒有甚麼不失望，
不過當你身邊的人都說好看的時候，
我就想問，
好看在甚麼。

它不是一個故事，
只是描寫身邊的人和空間，
當然也有很賤的橋段，令人忍唔住git一聲笑了出來。

有一堆經過計算的感覺和共鳴，
用剪接手法，不多不少，
不會令人覺得好悶咁囉。


余文樂做返自己，
楊千嬅根本就唔似，不過算做得幾好，
意外的是方皓玟都幾好feel，之前從來未留意過。

仲有一班朋友，大小谷，張達明，鄒凱光，
喂，本身佢地都係咁搞笑架啦，
你點拍都好睇格！

成件事，勁低成本囉。

好聽的，叫聰明，
事實上，我話係取巧。

仲有，我唔明點解係三級片囉，
又冇人除衫，又冇人打人，
啲粗口係平時周街都會聽到的。

OK, 我認！我唔抵得人地叻囉，呃左我70蚊！
搞到好鬱結。




幾好睇o既其實。 嗚。

一二三.....蘿蔔糕!

其實我想寫呢，初一初二初三都係蘿蔔糕。

我媽媽每年農曆年都會炮製一底蘿蔔糕

其實，一底蘿蔔糕對於一家四個人來說，真的太多了

於是呢，食左三日都未食完。


不過呢，幾日的食法應該有點不同

蒸好的第一晚呢(通常是年三十晚)....
好像bb一樣....滑嘟嘟 
沒有公德心的人如我就會拿匙羹"不"啦.....(係咪好衰呢)
"不"出來的糕是有蘿蔔絲的....呼呼.....小心"辣"親咀仔呵...

初一呢，雪左一晚之後，
蘿蔔糕可以煎喇.......煎到金黃色.....
再加一壼溶溶地的普洱
招呼親戚就最啱。

初二....食左三餐之後....其實已經有啲想放棄....................
唔緊要，呢個時候，我哋要拿出XO醬....
呀...我的味覺，重新有點樂趣了，嘻嘻。


年初三...........仲有三份一底

出街回家之後，家裡沒有人，

我認命地開爐，落油，煎糕．．．
pan的一半是馬蹄糕，另一半又係蘿蔔糕

哎.....

糕呀糕呀糕呀糕呀糕呀糕呀糕呀呀呀......


我宜家成個人都係充滿住糕。

二人餐

好看嗎？唔。

re-run的時候很想看，最後因為別人沒有空，所以沒有去看。

看見有3rd run, 就立即買了票。

以製作來說，三角關係 + 彭秀慧 (應該是 x 吧。哈哈)
是一貫的不錯。

細細粒，容易食，拎出來的時候熱辣辣，一定唔會唔好食的。

愛情的周期，人人不一樣，
有人一日吃三餐，有人吃五餐。

有人要空肚吃早餐，有人等下午茶時間才去食飯，
人人的時間也不同。

喜歡吃的也不同，

不過呢，總是要吃的。

++++++++++++
愛情，是意志力和感覺在對話，
有時候，他們在吵架，繼而動武，

感覺呢，有一股蠻力，
意志呢，勝在靭力夠。

難分難解。

通常，故事要好看，就把感覺寫得大力一點，
因為愛情，說到底，都係感覺行先，

實際來說，他們兩個要做朋友，不是很friend 那種，
而是惺惺相惜，「哈，你好嘢」．．．

最需要吃二人餐的，應該是這兩個吧。

+++++++++++
唉，上次個run去看，應該會好睇好多。

最少，給我一個好一點的回憶吧。

甜牙

我家的人都有隻sweet tooth。

我爸吃甚麼甜也是超甜

媽專攻糖水

我吃朱古力

我弟吃那些痴立立的糯米糍，麻薯，糖不甩．．．我成日話佢專食女人野



所以我們都被咀咒。糖尿病。

我覺得我們只遺傳了隻牙，所謂病只是因為控制唔到隻牙者．．．．


爸近日失守。 血糖有點超標。

但是他不是太控制到隻牙，
然後我發現家裡的朱古力及雪糕都經過喬裝，
例如換了第二個盒，或者用報紙包住，成箸咸菜咁．．．．

當然是我媽媽的手工。

所以我立志努力跑步。

我的志願是，第時可以和我個孫一起雪糕。

我唔想見到佢食，我冇得食。

食物週記

這星期吃了很多東西。

星期一：鈿結婚後的休息天，我只吃了一餐晚餐，和一行朱古力。

星期二：乙明村任食邊爐。 三支可樂。不過真係好得！我真係好麻甩。（我記得有人話過我花旦面，麻甩底，花旦面就未必，麻甩底就一定。）

星期三：為了贖罪，午餐吃了麥皮，夜晚重慶咖喱王，仲外賣了三大戲王ＤＶＤ回來慢慢煲，期待。

星期四：運星茶餐廳陳村粉，金菇肥牛煲，係咪好過份？又一麻甩力作。

星期五：小籠包午餐，美LOOK甜筒......同埋椰林角扒餐。

諗住今日在家乖乖地．．．點知原來今日阿公做生日。

今次真係跑去大圍都唔掂。

可樂雞翼

點解可樂雞翼冇可樂味?

點解過左咁多年我都希冀會整到有可樂味呢

如果可以的話，我想吃時間

吃了很多朱古力，天天都在吃。

沒有朱古力就找咖啡。

可可的味道無可取替，好像可以令時間快點過去。

做冬。返咁多年工都未試過早收。　

爸在包雲吞，「以前你兩個矮過張枱，死都要爬上來一齊包，宜家？哼。」

於是我包左兩行。

（整齊過國慶閱兵。）

呀，都未嘗唔係一個方法喎，等我搵啲最花時間的東西來整先。

例如雕一百個蘿蔔花。